නැවත හමුවෙමු ......

නැවත හමුවෙමු

නොහදුනන නෙත් දහස් ගණනක් අතර දුටු රුව සෙනෙහෙ තැවරූ

තෙපල රහසක් තදින් ලියැවුනි බිඳ දමා හද ගැබෙහි             ඉවුරූ

මවන රසවත් සුපෙම් හසරැළි ලැඟුම් ගත් කළ හිතට          නුහුරූ

හමන පවනත් දෙවන සිසිලස සමඟ යැද්දේ පහස             සොඳුරූ

යනෙන මඟ තොට තනිය මඟහැර දෙඅත් පටලන ඇවිද     ගියදුර

මතක සටහන් බවට පෙරළී හෙළයි සුසුමන් කඳුළ            හිමිකර

අවට ලෙළදෙන තුරු ලතාවන් තවම පෙරලෙස මවන        සිරිඟර

ගෙනෙන විරහව කෙලස ඉවසමි වසා ගමි මම දෙනෙත     තදකර

එදා සුළැඟිලි රන්හුයෙන් බැඳ සපත කල මුදු හැර       නොයන්නට

මෙදා සමුගෙන ගියේ ඇයි නුඹ දෙවිඳු තුරුළට යලි       නොඑන්නට

ලොවේ අස්ථිර කමක ඇති දුක මෙනෙහි කරගමි හිත   හැදෙන්නට

ඉතා නුදුරෙම සොයා එමි රස පෙම් කැදැල්ලක සුව         විඳින්නට

( මදු ඡන්දස, පුණුඅතිපුණු විරිත ඇසුරෙන්  )

(විරිතේ ස්වභාවය - සිව්පද කාව්‍යයක එක් පාදයක මාත්‍රා 28ක් යොදා ලඝු ගුරු භේදාදිය නැතිව මාත්‍රා 7 න් 7 ට යතිය තබා එළි සම කොට ලියැවෙයි. )

~~ ලියෝනි අමරතුංග - හැමිල්ටන් ~~

~*~*~

ඔබගේ අදහස් සහ ප්‍රතිචාර මගේ මීළඟ නිර්මාණයට විශාල ශක්තියකි. 
මගේ නිර්මාණය ඔබේ හදවතට දැනුණේ කෙසේද? 

❦ ❦ ❦ ❦ ❦ ❦ ❦ ❦❦ ❦ ❦ ❦ ❦ ❦ ❦ ❦ ❦ ❦ ❦ ❦ ❦ ❦ ❦❦ ❦ 

සේයාරූ අන්තර්ජාලයෙන් Google Images, - සියළු හිමිකම් මුල් හිමිකරුවන් සතුයි.
Subject to copyright.
සියලු හිමිකම් ලියෝනි අමරතුංග ( Leoni Amaratunga ) සතුය. සිතිවිලි මංපෙත - https://sithiwilimanpetha.blogspot.com/  බ්ලොග් අඩවියේ යොමුව සඳහන් කර හෝ ලියෝනි අමරතුංග යන නමින් පමණක් මෙහි ලිපි උපුටා පළ කරන්නට අවසර තිබේ. මෙහි පලවන කවි, කවි කතා හා වෙනත් සියළුම ලිපි මගේ පෞද්ගලික නිර්මාණ හා අදහස් පමණි. මගේ නිර්මාණ සම්බන්ධයෙන් ඔබ ඉදිරිපත් කරන ඕනෑම ප්‍රතිචාරයක් මෙහි පල කරනු ලැබේ. මගේ සිතිවිලි මංපෙත - Sithiwili Manpetha බ්ලොගයට ගොඩ වදින ඔබ සියලු දෙනාට ම මගේ ආදර ස්තූතිය පුද කරමි.