කවි කතාව - සෙනෙහසේ විරාජිත ගමන 3 - ( ශනිදා දහයට)

 - නිසල දෙපයට සවියක් වූ ආදරයක කතාව -

පසුගිය කොටසෙන් ..... 

ඉඳහිට මඟ තොටදි දෙදෙනම        හමුවන්නා

නෙක රස මියුරු පද සවනත         මුමුනන්නා

වැඩිහිටි අයගෙ ඔවදන් නොම        සිහිවන්නා

මෙලෙසට සොඳුරු පෙම් හබයක   පැටලෙන්නා

  

3  කොටස  

රකිනට උපන් දෙස සිව් කොණ මුර   කෙරුවේ

දකිනට ඇයව එනු නොහැකිය හැම    වරුවේ

තනිහිත ළඟම දුරකතනෙකි නිදි       වැරුවේ

එනමුදු බැඳුණු පෙම නොබිඳෙන ලෙස දැරුවේ

කාලය ගෙවෙත් මව් පිය කණ වැටුණි     මෙම

ආලය ඔවුන් රහසින් රැකි දිනෙක          හැම

අගනෙය රසට මුහුකළ විට බිඳුව          අම 

දිවි හිමියෙන්ම රැකගන්නට රිසිය         පෙම

 

දිනු බිම පුරා වෛරය ඇත            දළුලාලා

යුද පිටියක්ව සැම තැන බිය          පැතිරීලා

අවි අත දරා රැකුමට තම              ළයදීලා

යුහුසුළු වුණේ සෙබළුන් නැත         පසුබාලා

උතුරට යන්න විය නෙතු කඳුළැලි      උසුලයි

දුරකතනයක පහසින් සෙනෙහස       ලියලයි

ගතවුණු මාස ටික කල්පයකට         ඉහළයි

නැත හමු වුණේ පෙර මෙන් සිතුවිලි   සසලයි

සිතමින් නිබඳ ඔහු ගැන හද     ලතවෙන්නේ

මවමින් වියරු ඡායා මන          කලඹන්නේ

සිටිමින් අවදියෙන් සැම දෙවි       අයදින්නේ

සිහිනෙන් ළඟට විත් ඉඳහිට    කොඳුරන්නේ

 

මතු සම්බන්ධයි...... 

👈 2 කොටසට 

👉 4 කොටස  බලාපොරොත්තු වන්න.

~~ ලියෝනි අමරතුංග - හැමිල්ටන් ~~

~*~*~

මගේ නිර්මාණය ඔබේ හදවතට දැනුණේ කෙසේද? 
ඔබගේ අදහස් සහ ප්‍රතිචාර මගේ මීළඟ නිර්මාණයට විශාල ශක්තියකි. 

❦ ❦ ❦ ❦ ❦ ❦ ❦ ❦❦ ❦ ❦ ❦ ❦ ❦ ❦ ❦ ❦ ❦ ❦ ❦ ❦ ❦ ❦❦ ❦ 

Subject to copyright.
සියලු හිමිකම් ලියෝනි අමරතුංග ( Leoni Amaratunga ) සතුය. සිතිවිලි මංපෙත - https://sithiwilimanpetha.blogspot.com/  බ්ලොග් අඩවියේ යොමුව සඳහන් කර හෝ ලියෝනි අමරතුංග යන නමින් පමණක් මෙහි ලිපි උපුටා පළ කරන්නට අවසර තිබේ. මෙහි පලවන කවි, කවි කතා හා වෙනත් සියළුම ලිපි මගේ පෞද්ගලික නිර්මාණ හා අදහස් පමණි. (මෙහි අන්තර්ගත සිතුවම් AI තාක්ෂණය භාවිතයෙන් කළ නිර්මාණ වේ). මගේ නිර්මාණ සම්බන්ධයෙන් ඔබ ඉදිරිපත් කරන ඕනෑම ප්‍රතිචාරයක් මෙහි පල කරනු ලැබේ. මගේ සිතිවිලි මංපෙත - Sithiwili Manpetha බ්ලොගයට ගොඩ වදින ඔබ සියලු දෙනාට ම මගේ ආදර ස්තූතිය පුද කරමි.

කවි කතාව - සෙනෙහසේ විරාජිත ගමන 2 - ( ශනිදා දහයට)

- නිසල දෙපයට සවියක් වූ ආදරයක කතාව -

පසුගිය කොටසෙන් ..... 

වත පියකරුය සමවෙයි පුන්සඳ       සොඳුරු

දිදුලන නයන පරදයි විකසිත             තඹරු

දෙබැමද වැනිය ඉඳුදුනු නිලඹර          ඇතිරු

සුරලිය පරදවන යුවතිය හරි             මියුරු

2  කොටස 

සොහොයුරු කැලක් මැද ඇය වෙයි බඩ   පිස්සී

සුරතලයට හැදුණෙ එනතුරු ලැම           ඉස්සී

යනවිට නිතඹ තාලයකට යන               ගැස්සී

නමවෙයි සඳුනි සිප් සතරට හරි             දස්සී

යහමින් ලැබුණ සැම දෙනගේ              ආදරය

විඳිමින් වැඩුණු ඇය ඒකට                  කෑදරය

ඔවදන් ලබා තරමින් මහ                   සාගරය

බෙදමින් සුවඳ යා යුතු මඟ              බෝ දුරය

කෙළිලොල් දැරිවි ලිහිණිය බඳු කිරල      කැලේ

දවසක් යෙහෙළියක හමුවට ගියපු         වෙලේ

තරුණෙක් නෙතු ගැටී හදවත නමැති       විලේ

සහසක් කුසුම් පිබිදී වත එළිය              කළේ

හැඩිදැඩි කයට උඩු රැවුලද         ගැළපෙන්නේ

දුටුවිට වසඟ වන පෙනුමකි          මතුවෙන්නේ

'හිරුණක' ලෙසිනි හැමදෙන ඔහු    අමතන්නේ

ඇගෙ හදවතේ ඵල නෙළුමට       සැරසෙන්නේ

ඉඳහිට මඟ තොටදි දෙදෙනම          හමුවන්නා

නෙක රස මියුරු පද සවනත           මුමුනන්නා

වැඩිහිටි අයගෙ ඔවදන් නොම         සිහිවන්නා

මෙලෙසට සොඳුරු පෙම් හබයක   පැටලෙන්නා

මතු සම්බන්ධයි...... 

👈 1 කොටසට 

👉 3 කොටසට 

~~ ලියෝනි අමරතුංග - හැමිල්ටන් ~~

~*~*~

මගේ නිර්මාණය ඔබේ හදවතට දැනුණේ කෙසේද? 
ඔබගේ අදහස් සහ ප්‍රතිචාර මගේ මීළඟ නිර්මාණයට විශාල ශක්තියකි. 

❦ ❦ ❦ ❦ ❦ ❦ ❦ ❦❦ ❦ ❦ ❦ ❦ ❦ ❦ ❦ ❦ ❦ ❦ ❦ ❦ ❦ ❦❦ ❦ 

Subject to copyright.
සියලු හිමිකම් ලියෝනි අමරතුංග ( Leoni Amaratunga ) සතුය. සිතිවිලි මංපෙත - https://sithiwilimanpetha.blogspot.com/  බ්ලොග් අඩවියේ යොමුව සඳහන් කර හෝ ලියෝනි අමරතුංග යන නමින් පමණක් මෙහි ලිපි උපුටා පළ කරන්නට අවසර තිබේ. මෙහි පලවන කවි, කවි කතා හා වෙනත් සියළුම ලිපි මගේ පෞද්ගලික නිර්මාණ හා අදහස් පමණි. මගේ නිර්මාණ සම්බන්ධයෙන් ඔබ ඉදිරිපත් කරන ඕනෑම ප්‍රතිචාරයක් මෙහි පල කරනු ලැබේ. මගේ සිතිවිලි මංපෙත - Sithiwili Manpetha බ්ලොගයට ගොඩ වදින ඔබ සියලු දෙනාට ම මගේ ආදර ස්තූතිය පුද කරමි.

කවි කතාව - සෙනෙහසේ විරාජිත ගමන 1 - ( ශනිදා දහයට)

- නිසල දෙපයට සවියක් වූ ආදරයක කතාව -

 1  කොටස 

දළුපොත නමිනි හෙළ දෙරණට සිරි      මවපු

ඵලබර ගමකි සරු කෙත් වතු මැදි       කරපු

තම දරු පැටව් හා නිදුකින් දිවි           ගෙවපු

පවුලකි වැජඹුණේ සෙනහස නිති          විඳපු

පැසසුම් ලබා සිප් නැණයෙන් ලොව       දින්න

කුසුමන් ලෙසට එක ඉත්තට බර            දුන්න

දුටුවන් සතුටු වන යහගුණ නිති            දන්න

දරුවන් අඹරෙ සුදිලෙන රන් තරු        වැන්න

එක එක දරුව තම කල වයසද           සපිරු

හෙළ කුල සිරිත මත බැඳ ආදර           පවුරු

තනනට කැදැලි සුවඳැති කුසුමෙන       ඇතිරු

ඉඟිළල ගියේ තුටු කඳුළිනි නෙත           ඉතිරු

 

අද මෙම කතාවේ මුලසුන අර             ගන්නි

එම නිවසෙහිම විසු බඩපිස්සිය            වන්නි

හරි හැඩකාරි ගමටම සිරි ගෙන          එන්නි

දුටු වන සිත් සතන් නිතැතින් බැඳ       ලන්නි

වත පියකරුය සමවෙයි පුන්සඳ       සොඳුරු

දිදුලන නයන පරදයි විකසිත             තඹරු

දෙබැමද වැනිය ඉඳුදුනු නිලඹර          ඇතිරු

සුරලිය පරදවන යුවතිය හරි             මියුරු

මතු සම්බන්ධයි...... 

👉 2 කොටස 

~~ ලියෝනි අමරතුංග - හැමිල්ටන් ~~

~*~*~

මගේ නිර්මාණය ඔබේ හදවතට දැනුණේ කෙසේද? 
ඔබගේ අදහස් සහ ප්‍රතිචාර මගේ මීළඟ නිර්මාණයට විශාල ශක්තියකි. 

❦ ❦ ❦ ❦ ❦ ❦ ❦ ❦❦ ❦ ❦ ❦ ❦ ❦ ❦ ❦ ❦ ❦ ❦ ❦ ❦ ❦ ❦❦ ❦ 

Subject to copyright.
සියලු හිමිකම් ලියෝනි අමරතුංග ( Leoni Amaratunga ) සතුය. සිතිවිලි මංපෙත - https://sithiwilimanpetha.blogspot.com/  බ්ලොග් අඩවියේ යොමුව සඳහන් කර හෝ ලියෝනි අමරතුංග යන නමින් පමණක් මෙහි ලිපි උපුටා පළ කරන්නට අවසර තිබේ. මෙහි පලවන කවි, කවි කතා හා වෙනත් සියළුම ලිපි මගේ පෞද්ගලික නිර්මාණ හා අදහස් පමණි.  මගේ නිර්මාණ සම්බන්ධයෙන් ඔබ ඉදිරිපත් කරන ඕනෑම ප්‍රතිචාරයක් මෙහි පල කරනු ලැබේ. මගේ සිතිවිලි මංපෙත - Sithiwili Manpetha බ්ලොගයට ගොඩ වදින ඔබ සියලු දෙනාට ම මගේ ආදර ස්තූතිය පුද කරමි.

පුංචි බිංදු සහ වටිනා පාඩම - ශනිදා දහයට

 පුංචි බිංදු සහ වටිනා පාඩම

ඔන්න එක පුංචි කැලෑවක, ලස්සන මල් පිරුණු උයනක හිටියා පුංචි මී මැස්සෙක්. එයාගේ නම තමයි "බිංදු". බිංදු කියන්නේ හරිම උත්සාහවන්ත, හැබැයි ටිකක් ඉක්මන්කාරී පුංචි මී මැස්සෙක්.

දවසක් උදේ පාන්දර බිංදු තීරණය කළා අලුත් මල් පැණි ටිකක් සොයාගෙන ලොකු ගමනක් යන්න. හැබැයි එයාගෙ මී මැසි අම්මා එයාට කිව්වා,

"බිංදු පුතේ, අද දවසේ කාලගුණය ටිකක් වෙනස් වෙන්න පුළුවන්, පරිස්සමින් ගිහිල්ල එන්න" කියලා. 

ඒත් බිංදු ඒක එච්චර ගණන් ගත්තේ නැහැ. 

"හා මම ඉක්මනට ගිහිල්ලා එන්නම්කො" කියලා එයා උයනෙන් පිටත් වුණා.

බිංදු ගොඩාක් මල් වලට ගිහිල්ලා මී පැණි එකතු කරගත්තා. ඒ අතරතුර එයාට හම්බ වුණා රත්තරන් පාට ලස්සනම ලස්සන මලක්.  ඒ මල දැකපු බිංදුගේ කෑදරකම වැඩි වුණා.  එයාට අමතක වුණා මී මැසි අම්මා කිව්ව දේ.  ඔන්න එක පාරටම කලු වළාවන් අහස වහගන්න පටන් ගත්තා.  හුළඟත් ටිකක් තදින් හමන්න ගත්තා.  වැහි බිංදු ත් වැටෙන්න පටන් ගත්තත් බිංදු ඒ ලස්සන මල අත ඇරලා යන්න කැමති වුණේ ම නැහැ. 

 "තව ටිකයි...., තව ටිකයි...." 

කියලා එයා තවමත් මල වටේ කැරකෙනවා.  එකපාරටම ආපු ලොකු හුළං පාරක් එක්ක මහා වැස්ස කඩා වැටුණා!  බිංදුට පියාඹන්න බැරි තරමට තටු තෙමිලා, එයා බිමට වැටුණා.

එතකොටම එතනට ආවා පොඩි කූඹි පැටවෙක්.

 එයාගේ නම "ටිංකර්". ටිංකර් ළඟ පුංචි කොළ කැබැල්ලක් තිබුණා කුඩයක් වගේ. ටිංකර් ඉක්මනට දුවලා ඇවිත් බිංදුව ඒ කොළය යටට අරගෙන පරිස්සම් කළා. 

බිංදු ගොඩාක් බය වෙලා, වෙව්ල වෙව්ල යි හිටියේ.

"අම්ම කිව්වා දේ ඇහුවේ නැති නිසා නේ මෙහෙම උනේ"

 කියලා බිංදු අඬන්න පටන් ගත්තා.  ටිංකර් එයාට ධෛර්යය දීලා කිව්වා,  "අඬන්න එපා යාළුවා,  අපිට වැරදුන තැන තේරුම් අරන් හැදෙන එක තමයි වැදගත්" කියලා.

ටිකකින් වැස්ස ඉවරවුණාම බිංදු පරිස්සමින් එයාලගේ කූඩුවට ගියා. 

ඔන්න ඉතින් එදා ඉඳන් බිංදු කවදාවත් වැඩිහිටියන්ගේ අවවාද නොසලකා හැරියේ නැහැ.  හැමෝටම උදව් කරමින්, කීකරු පුංචි මී මැස්සෙක් විදිහට එයා සතුටින් ජීවත් වුණා.

අපිට මේ කතාවෙන් ඉගෙන ගන්න තියෙන පාඩම:

වැඩිහිටියන් කියන දේ අසා,  අනතුරු අඟවන දේවල්වලට ඇහුම්කන් දීලා,  කෑදරකමින් තොරව කටයුතු කිරීමයි ජීවිතයේ සාර්ථකත්වයට හේතුව!

~~ ලියෝනි අමරතුංග - හැමිල්ටන් ~~

~*~*~

මගේ නිර්මාණය ඔබේ හදවතට දැනුණේ කෙසේද? 
ඔබගේ අදහස් සහ ප්‍රතිචාර මගේ මීළඟ නිර්මාණයට විශාල ශක්තියකි. 

❦ ❦ ❦ ❦ ❦ ❦ ❦ ❦❦ ❦ ❦ ❦ ❦ ❦ ❦ ❦ ❦ ❦ ❦ ❦ ❦ ❦ ❦❦ ❦ 

Subject to copyright.
සියලු හිමිකම් ලියෝනි අමරතුංග ( Leoni Amaratunga ) සතුය. සිතිවිලි මංපෙත - https://sithiwilimanpetha.blogspot.com/  බ්ලොග් අඩවියේ යොමුව සඳහන් කර හෝ ලියෝනි අමරතුංග යන නමින් පමණක් මෙහි ලිපි උපුටා පළ කරන්නට අවසර තිබේ. මෙහි පලවන කවි, කවි කතා හා වෙනත් සියළුම ලිපි මගේ පෞද්ගලික නිර්මාණ හා අදහස් පමණි. මගේ නිර්මාණ සම්බන්ධයෙන් ඔබ ඉදිරිපත් කරන ඕනෑම ප්‍රතිචාරයක් මෙහි පල කරනු ලැබේ. මගේ සිතිවිලි මංපෙත - Sithiwili Manpetha බ්ලොගයට ගොඩ වදින ඔබ සියලු දෙනාට ම මගේ ආදර ස්තූතිය පුද කරමි. 

අලුත් යමක් ..

මගේ ආදර යහළු යෙහෙළියනි....,

හැමදාමත් කවි, කවි කතාන්දර ලියන මට කලෙක ඉදලා වෙනස්ම විදිහේ අදහසක් පහළ වුණා. හැමදාමත් මගේ කවි, කවි කතා කියවලා ඔයාලට ටිකක් මහන්සිත් ඇතිනේ නේද?

ඇත්තටම මේක අවුරුදු ගාණක් ඉඳලාම මගේ හිතේ තිබුණු අදහසක්. කොහෙන්ද පටන් ගන්නේ කියලා තමා මෙතෙක් කල් හිත හිත හිටියේ...

ඉතින් ඔන්න හෙට සිටම ඒ අදහස යථාර්ථයක් බවට පත් කරගන්න මම තීරණය කළා. ඒ කියන්නේ හෙට ශනිදා දහයට මම ඔයාලගේ නිවහනට එන්නේ සුපුරුදු කවියෙන් නෙමෙයි; පුංචි දරුවන්ගේ ලෝකය වර්ණවත් කරන අලුත්ම ළමා පිටුවක් එක්කයි! මැරෙන්න කලින් පුංචි පැටව්න්ටත් මොනා හරි කළා නම් හොඳයි කියලා මගේ හිත හැමවිටම මට කතා කරලා කිව්වා. 

මෙයින් කියන්නේ මම සදහටම කවියෙන් සමු ගන්නවා කියලා එහෙම නෙමෙයි ඕන්. කවි ලියන අතරම මේකත් කරන්න පුළුවන් නේ.. 

දැනට මම ඉදිරිපත් කරන්න හිතාගෙන ඉන්නේ පුංචි ළමා කතාන්දර .. 

මගේම නිර්මාණ, පැරණි සුරංගනා කතා, උපමා කතා වගේ නොයෙකුත් මාදිලියේ ළමා කතා ගෙන එන්න තමා මම හිතාගෙන ඉන්නේ. 

එත් ඉදිරියේදී තව අලුත් අංගත් මෙයට එකතු කරන්න මම බලාපොරොත්තු වෙනවා. දන්නා අඳුනන පුංචි පැටවුන්ගේ පුංචි චිත්‍ර වලිනුත් මේ පිටුව සරසන්න මම ආසයි. ඔබේ නිවසේ ඉන්න පුංචි දරුවන්ගේ නිර්මාණ තියේනම් මා වෙත එවන්න කියලාත් මම සෙනෙහසින් ආරාධනා කරනවා.

මේ අලුත් ආරම්භය ගැන ඔයාල මොනාද හිතන්නේ? ඔබේ අදහසත් මට කමෙන්ට් එකකින් කියන්නකෝ..

එහෙනම් සුපුරුදු පරිදි සුපුරුදු වෙලාවට සුපුරුදු තැන වන "සිතිවිලි මංපෙත" බ්ලොගයෙන් ශනිදා දහයට අපි හමුවෙමු.

එතෙක් මගේ යාළුවො සැමටම සුවබර දවසක්!

~~ ලියෝනි අමරතුංග - හැමිල්ටන් ~~

~*~*~

මගේ නිර්මාණය ඔබේ හදවතට දැනුණේ කෙසේද? 
ඔබගේ අදහස් සහ ප්‍රතිචාර මගේ මීළඟ නිර්මාණයට විශාල ශක්තියකි. 

❦ ❦ ❦ ❦ ❦ ❦ ❦ ❦❦ ❦ ❦ ❦ ❦ ❦ ❦ ❦ ❦ ❦ ❦ ❦ ❦ ❦ ❦❦ ❦ 

Subject to copyright.
සියලු හිමිකම් ලියෝනි අමරතුංග ( Leoni Amaratunga ) සතුය. සිතිවිලි මංපෙත - https://sithiwilimanpetha.blogspot.com/  බ්ලොග් අඩවියේ යොමුව සඳහන් කර හෝ ලියෝනි අමරතුංග යන නමින් පමණක් මෙහි ලිපි උපුටා පළ කරන්නට අවසර තිබේ. මෙහි පලවන කවි, කවි කතා හා වෙනත් සියළුම ලිපි මගේ පෞද්ගලික නිර්මාණ හා අදහස් පමණි. මගේ නිර්මාණ සම්බන්ධයෙන් ඔබ ඉදිරිපත් කරන ඕනෑම ප්‍රතිචාරයක් මෙහි පල කරනු ලැබේ. මගේ සිතිවිලි මංපෙත - Sithiwili Manpetha බ්ලොගයට ගොඩ වදින ඔබ සියලු දෙනාට ම මගේ ආදර ස්තූතිය පුද කරමි. 

නිහඬ සමුගැනීම - (ශනිදා දහයට)

නෙතු තෙමමින් හෙළන සුසුම් බැහැ මෙතෙකැයි කියන්න

හිත මත තිබු සිහින පොදට බැඳි පෙම් සිත         බිඳින්න

ගිය පසු නුඹ ගමෙන් ඉගිළ මතු දියුණුව             ලබන්න

සිදුවුණි මට මතක පොතේ පිටු අමතක             කරන්න

පෙරමඟ බැලු නමුදු අඳුරෙ අතර මඟක           ගෙවන්න

දුක රඳවා සිතෙහි තනිව මේ කඳුළැලි                 දරන්න

නොකියා ගිය දුරක් නැවත නොඑන බවක්       දැනෙන්න

හැකි වී ඇත පෙමෙහි තරම නිහඬව සිහි           කරන්න

අද මා හැර ගියත් ලොවේ ජය මංපෙත            තනන්න

ළය උපදින සෙනෙහෙ නමින් නිරතුරු සුව       සැදෙන්න

යළි හමු වන දිනක් නොමැත මුදු පහසක්           විඳින්න

පුරනෙමි පෙරුමන් දවසක නුඹ තුරුලෙහි          නිදන්න

~~ ලියෝනි අමරතුංග - හැමිල්ටන් ~~

~*~*~

මගේ නිර්මාණය ඔබේ හදවතට දැනුණේ කෙසේද? 
ඔබගේ අදහස් සහ ප්‍රතිචාර මගේ මීළඟ නිර්මාණයට විශාල ශක්තියකි. 

❦ ❦ ❦ ❦ ❦ ❦ ❦ ❦❦ ❦ ❦ ❦ ❦ ❦ ❦ ❦ ❦ ❦ ❦ ❦ ❦ ❦ ❦❦ ❦ 

Subject to copyright.
සියලු හිමිකම් ලියෝනි අමරතුංග ( Leoni Amaratunga ) සතුය. සිතිවිලි මංපෙත - https://sithiwilimanpetha.blogspot.com/  බ්ලොග් අඩවියේ යොමුව සඳහන් කර හෝ ලියෝනි අමරතුංග යන නමින් පමණක් මෙහි ලිපි උපුටා පළ කරන්නට අවසර තිබේ. මෙහි පලවන කවි, කවි කතා හා වෙනත් සියළුම ලිපි මගේ පෞද්ගලික නිර්මාණ හා අදහස් පමණි. මගේ නිර්මාණ සම්බන්ධයෙන් ඔබ ඉදිරිපත් කරන ඕනෑම ප්‍රතිචාරයක් මෙහි පල කරනු ලැබේ. මගේ සිතිවිලි මංපෙත - Sithiwili Manpetha බ්ලොගයට ගොඩ වදින ඔබ සියලු දෙනාට ම මගේ ආදර ස්තූතිය පුද කරමි.