පැතුම

 

 

පැතුම 

 

අහිමි සෙනෙහස සවන් පත් මත කොඳුරනා තිස් තුන් පැයේ
නිදන සිතිවිලි අතර සහසක් අවදි වූ පැතුමන්            තියේ
දකින සිහිනද මනස කළඹයි ශෝක ගී දසතින්          වැයේ
ඉපිද මියැදෙන සුසුම් දහරින් සතපවමි හැඟුමන්         ළයේ

 

සුමුදු පියකරු තඹරු සහසක් හිනැහුනා නිල් දිය        පුරා
පසෙක රතැඟිලි පටල පෝරුව මත සිටියෙ කුසුමිය    දරා
කෙලෙස හදවත වාවගමි උණු කඳුළු පිබිඳුනි නෙතු      ඉරා 
 ඉපිද මතුභව එනු මැනවි සෙනෙහසිනි මාගේ ලොව    කරා  

~~ ලියෝනි අමරතුංග ~~

~~~~~~

සේයාරූ අන්තර්ජාලයෙන් Google Images, - සියළු හිමිකම් මුල් හිමිකරුවන් සතුයි.

 

හිමි සඳ

 

හිමියනි ..

හිමියනි පිවිතුරු
නුඹමය ම'සඳ දිවිතුරු
අවසන දිනය එනතුරු
වනුමැන මගේ සුමිතුරු

දිවිනිම වනතුරු
විලසට අහසෙ දිලිතරු
මවමින ලොවක් විසිතුරු
හිඳිනෙමි ළඟම නිරතුරු

(ගජගැමි ගී විරිත ඇසුරෙනි )

~~ ලියෝනි අමරතුංග ~~

~~~~~~

විරිතේ ස්වභාවය එලු සඳස් ලකුණෙහි අර්ථ ගන්වා ඇති යුරු..

වසමැ අට එකොළොස්
සම පෙදෙහි ඇර බව්නෙන්
සම එළි කොටින් බැඳි
ගජගැමි නමැයි දන්නේ.

 ~~~~~~~~~~~~~~~~~~~~~~~~~