දෝණි 5 (ශනිදා දහයට)

කවි කතාව

පසුගිය කොටසෙන්.................

ඉගෙනුම නිමා කර ඇය ඇත            පැමිණීලා

මව පිය දෙදෙන තුටු සයුරෙහි            කිමිදීලා

නිසි කල වයස ගිලිහෙනු පෙර         බොඳවීලා

හොඳ පෙළ වහක් කර දීමට            සැරසීලා

5 කොටස 

අතමිට සරුයි දැරියත් හරි දැකුම්        කළුයි

සුසිනිදු වතද පුබුදින සුදු පියුම්             බඳුයි

මිණිකැට සදිසි නෙතු සඟලේ කැලුම්     මුදුයි

මියුලැස දීග යන නිවසට පහන්            සිළුයි

කපු මහතාට එන්ටය පණිවුඩ               යවපූ

පවුලට ඇවැසි පිළිවෙළ පැහැදිලි           කරපූ

මවපිය දෙදෙන යුතුකම අකුරට           රැකපූ

දියණිට සොයයි සහකරුවෙකු ගුණ       වඩපූ

බිළිදිය දා පටන් තම පණ මෙන්            සුරැකී

පැද යන දිවි ඔරුව ගැන ඔවදන්           රැසකී

යහ ගුණ ඇතුළු සැම දෙය ඉහතින්    නොමකී

සමඟම දෑවැදිද ඇති මසුරන්             තැනකී

නවතම නිවස පිහිටා ඇති නගරෙ            මැද

ගොඩ මඩ වලද වටිනාකම වැඩිය             අද

සියලුම දෙයම දුවටයි නොම කරන           වද

සොයනට කීවෙ කොළු ගැටයකි පිරුණු    තෙද

පණ හා දෙවෙනි කොට රැකි තම එකම     දරු

යවලා කොහොම වෙන ගමකට තිබෙන     දුරු

නැවතී දෙමාපිය සමඟම දිවිය                 තුරු

සිටිනා කෙනෙකුටයි ඇරයුම බොහොම     ගරු

මතු සම්බන්ධයි......

~~ ලියෝනි අමරතුංග ~~

👈 4 කොටසට 
👉 6 කොටස​​ට 

~~~~~~

සේයාරූ අන්තර්ජාලයෙන් Google Images. - සියළු හිමිකම් මුල් හිමිකරුවන් සතුයි.

සුබ නත්තලක් වේවා. (ශනිදා දහයට)

සාමය සතුට සෞභාග්‍යය පිරි සුභ නත්තලක් වේවා !

බෙත්ලෙහෙමේ සිසිලෙ.....

 එක දිගටම මගේ කවි කතාව බලලා මගේ යාලුවෝ හැමෝටම ටිකක් මහන්සි ඇති කියලා හිතුන නිසා අද පොඩි වෙනසක් කරන්න ඕන කියල මට හිතුනා.

හරියටම තව දවස් දෙකකින් ඒ කියන්නේ දෙසැම්බර මාසේ 25 වෙනිදාට ලොවට සාමය උදාකළ ජේසු බිලිඳුගේ උපත සමරන්න අපි හැමෝම බලන් ඉන්න නිසා ඒ සම්බන්ධයෙන් මොනවා හරි කළානම් හොඳයි කියලයි මගේ හැඟීම 

ඒක නිසා කාලෙකට ඉස්සර මම රචනා කරපු නත්තල් ගීතිකාවක් ගෙන එන්න හිතුනා.

මේ ගීතය නිර්මාණය වුණේ කැනඩාවේ තිබුන  කලා කවය කියන වැඩසටහනට. 

මෙම ගීතයට සංගීතය නිර්මාණය කළේ තිස්ස ගුණසේකර කියන කැනඩාවෙම අපිත් එක්කම ජීවත් වෙලා ඉන්න අපේම සහෝදරයෙක්. 

ඒවගේම ගීත ගායනයෙන් සහභාගී වුණෙත් කැනඩාවේ හැමිල්ටන් නගරයේ ජීවත් වෙන අපේම යාලුවෝ කිහිප දෙනෙක්.  

එහෙනම් ඉතින් ඔයාල ගීතය රසවිඳ  ඔයාලගේ හිතට දැනෙන මොනා හරි දෙයක් අපිටත් කියන්නකෝ ඒක දැනගන්න මම හරි ආසාවෙන් බලාගෙන ඉන්නවා.

බෙත්ලෙහෙමේ සිසිලේ.....

( බෙත්ලෙහෙමේ සිසිලේ

මරිය මව් තුරුලේ

ගවහල තුළ දි උදුවප් මාසෙ

නැළවෙයි දෙව් බිළිදා ) //

රන් තරුවක් අඹරේ දිලුනා

සුපුවත ලොව වෙත පතුරා

සව් සත හට සාමය බෙදනා 

දෙව් බිළිඳුන් ලෝ දිනුදා

බෙත්ලෙහෙමේ සිසිලේ

මරිය මව් තුරුලේ

ගවහල තුළ දි උදුවප් මාසෙ

නැළවෙයි දෙව් බිළිදා

රජවරු ගොපළු රෑන් ඇඳුනා

සතුටින් සිත් පිපුනා

සුවඳ ලාටු රන් දුම් රැගෙනා

නිරිඳුන් වැඳ පිඳුවා

( බෙත්ලෙහෙමේ සිසිලේ

මරිය මව් තුරුලේ

ගවහල තුළ දි උදුවප් මාසෙ

නැළවෙයි දෙව් බිළිදා ) //

හිනැහෙයි දෙව් බිළිදා

නැළවෙයි දෙව් බිළිදා

හිනැහෙයි දෙව් බිළිදා 

~~

සංගීතය - තිස්ස ගුණසේකර 

පද රචනය - ලියෝනි අමරතුංග 

ගායනය - තිස්ස ගුණසේකර ඇතුළු පිරිස.

-  ගායන සහය  -

ලියෝනි අමරතුංග 

අසංගා බෝගෙදර 

මෙල්වින් විජේසුන්දර 

ක්වින්සි විජේසුන්දර 

මිල්ටන් වාසල 

නිමල් දිසානායක 

පර්සි ප්‍රනාන්දු

ඔබ සැමට සාමය සතුට සෞභාග්‍යය පිරි සුභ නත්තලක් පතමින්ම මම නවතින්නම්.

🙏

දෝණි 4 (ශනිදා දහයට)

කවි කතාව

පසුගිය කොටසෙන්.................

ගම මායිමට වෙන්නට මිලදී               ඉඩමක්

නව ආරෙකට තනවා යස ගේ          පොඩියක්

කිරි උතුරවා නැකතට ගයලා              පිරිතක්

තිර සර විසුම විය සැම දනගේ           සතුටක්

4 කොටස  

මව සහ පියා ගම පාසලෙ ශිල්ප             දෙන

අතරම දුවණි යැවුනේ නගරෙකට          වෙන

සවසට පැමිණ පාඩම් වැඩ නිමවු           තැන

දුව පැන නටයි මිතුරන් සැම එකෙකු      මෙන

ගම පාසැලේ දරු දැරියන් සිත              නිවන

දෙනිබිම අසල ඇති සහනය සුව           මවන

අරණෙහි ගත දැවටි සිහිලැල් මද          පවන

මන දොළ සතපවයි සරසා දිවි              බවන

වැඩිවිය පැමිණි දින මේ පින්බර             දුවනි

තුටුවිය ගමේ සැම ආදර හද               බැතිනි

නැකතට සියළු කටයුතු ඉටුකර         සොඳිනි

පැතුවනෙ ජයෙන් ජය සෙනෙහස පිරි    හදිනි

වෙහෙසව යොදා සිත කය තම දියුණ      ගැන

අහවර කළා දෙටු පෙළ දිවි විජය           ගෙන

වැඩි ඉගෙනුමට සරසවියට ඇතුළු            වන

දින නෙතු පොඟයි තුටු කඳුළින හදෙනි    පැන

ඉගෙනුම නිමා කර ඇය ඇත            පැමිණීලා

මව පිය දෙදෙන තුටු සයුරෙහි            කිමිදීලා

නිසි කල වයස ගිලිහෙනු පෙර         බොඳවීලා

හොඳ පෙළ වහක් කර දීමට            සැරසීලා

මතු සම්බන්ධයි......

~~ ලියෝනි අමරතුංග ~~

👈 3 කොටසට 
👉 5 කොටසට 

~~~~~~

සේයාරූ අන්තර්ජාලයෙන් Google Images. - සියළු හිමිකම් මුල් හිමිකරුවන් සතුයි.

දෝණි 3 (ශනිදා දහයට)

කවි කතාව

පසුගිය කොටසෙන්.................

 තම දිවි තලයෙ කල වයසත් පසු          කරන

ලොකු පොඩි සැමට නෙක සහනය නිති බෙදන

ගම පන්සලේ දායක නිල තල                දරන

රජවරු වැනිය වැඩ සිටි හෙළ දිව        පුරණ

3 කොටස  

නිරතුරු ගමට එන කලු කඩ             මුදලාලි
ලොකු මුදලකට විකුණයි පොඩි බඩු      කෑලි
දෙසවන ගැටී ගම්මුන් පවසන             සෝලි
අහුරන ලදිය මඟ නොඑනට පැන          වේලි

වියැකෙන අතර කාලය තම දිවි           පලසේ
ඇත පෙර නිමිති පහලව ලොවටම       රහසේ
තුරුළට රැගෙන නැළැවිලි ගී පද          රසසේ
ගයමින ප්‍රීති වීමට බිරිඳක                 පැතුසේ

දිවි මං තලාවේ  වෙනසකි           ඇරඹෙන්නේ
පැතුසේ පුංචි ළදැරියකිය             පිවිසෙන්නේ
සැමගේ සෙනෙහෙ සුව විඳිමින    සුරැකෙන්නේ
ඔප වී වැඩී යහගුණයෙනි             සපිරෙන්නේ

දැඩි ලෙස ගමට පෙම් බැඳි මෙම ගුරු     යුවල

සපථව අතැර නොයනා ලෙස බිම           සපල 

රැඳෙනට සිතයි සමඟින ගැමි දන           නිමල

මතුදින තමන් දිවි ගඟ වනතුරු              නිසල

ගම මායිමට වෙන්නට මිලදී                ඉඩමක්
නව ආරෙකට තනවා යස ගේ           පොඩියක්
කිරි උතුරවා නැකතට ගයලා               පිරිතක්
තිර සර විසුම විය සැම දනගේ           සතුටක්

මතු සම්බන්ධයි......

~~ ලියෝනි අමරතුංග ~~

👈 2 කොටසට

👉 4 කොටසට

~~~~~~

සේයාරූ අන්තර්ජාලයෙන් Google Images. - සියළු හිමිකම් මුල් හිමිකරුවන් සතුයි.

දෝණි 2 (ශනිදා දහයට)

  කවි කතාව

පසුගිය කොටසෙන්.................

වෙසෙනා නිවස යාබද සිප් නැණ          පියස

ඇමදා මිදුල අළුයම දුරලන                 අලස

වැඳලා බුදුන් පිළිගෙන නොඉඳුල           දවස

නිතිනා සිරිය රඳවයි දෙවොලක           විලස

~~~~~~~~

2 කොටස  

නව යුග දිවි පිවිසි මේ ගුරුවරු         දෙන්නා
හිමිදිරි උදයෙ පාසැල වෙත පිය         මැන්නා
එහි සිසු දරුවො සැමටම යහ මඟ     පෙන්නා
වැජබෙන ලදිය මිහිපිට දෙවිවරු        වැන්නා

කුස ගින්දරින් පෙළෙනා පොඩි         දරුවනට
අත මිට මුදල ගැවසෙන  ගම         වැසියනට
නොම කර වෙනස් කම් හොඳ සක  සුරුවමට
දෙති සහයෝගෙ එකඟව තම         හදවතට

ඉඳහිට පොලොස් ඇඹුලක් වෙල් මාළු     ඉතා
රසකර උයා රතු කැකුළුද මුලෙහි         ඔතා
ගම විසු සියළු දරුවන් එක සමව          සිතා
කුසගිණි නිවා පවසයි රස පිරුණු         කතා

පරිනත වෙමින දැනුමෙනි ගුණයෙනි     දැයට
දියකර හරිති ඇති ලෞකික සැප          රුවට
මතුවන නමුදු එක දෙක නර කෙඳි        හිසට
අපමණ තුටක් දුනි ගුරුවෘතිය              ලයට

තම දිවි තලයෙ කල වයසත් පසු          කරන
ලොකු පොඩි සැමට නෙක සහනය නිති බෙදන
ගම පන්සලේ දායක නිල තල                 දරන
රජවරු වැනිය වැඩ සිටි හෙළ දිව         පුරණ

මතු සම්බන්ධයි......

~~ ලියෝනි අමරතුංග ~~

👈 1 කොටසට  

👉 3 කොටසට  

~~~~~~

සේයාරූ අන්තර්ජාලයෙන් Google Images. - සියළු හිමිකම් මුල් හිමිකරුවන් සතුයි.

දෝණි 1 (ශනිදා දහයට)

  කවි කතාව

1 කොටස

 හද  බැති  මිතුරු වැඩිහිටි, බාලයිනෙ  සොඳ

නව කවි කතාවක ඇරඹුම තබමි            අද

දින දින ගෙවී යන ලෝකයෙ අරුම          විඳ

රැදෙනට ඇරයුමයි මේ සෙනෙහසිනි      තෙද

ගහකොළ නිලට දිලෙනා පින්සාර       කෙත

මැදිකර ගලයි ගං කොමළිය පිනන      සිත

නුදුරෙහි ගගන සිප නැළවෙන බඳන   නෙත

පොබකර කඳු වැටිද සැතපෙයි අසල   පෙත

ඉඳිගොඩ නගරයට නුදුරුවු කුඩළු        ගම

ජයගෙන තිබුනි සැම දන හිත මුතුරු     කම

මැදිකර තැනුන නැණ වපුරන සොඳුරු    ඉම

විසු ගුරු යුවල ගැන අටුවා ටිකා           එම

වෙසෙනා නිවස යාබද සිප් නැණ         පියස

ඇමදා මිදුල අළුයම දුරුකර              අලස

වැඳලා බුදුන් පිළිගෙන නොඉඳුල         දවස

නිතිනා සිරිය රඳවයි දෙවොලක         විලස

මතු සම්බන්ධයි......

2 කොටසට  👉

~~ ලියෝනි අමරතුංග ~~

~~~~~~

සේයාරූ අන්තර්ජාලයෙන් Google Images. - සියළු හිමිකම් මුල් හිමිකරුවන් සතුයි.

"දෝණි" (ශනිදා දහයට)

කවි කතාව 

 

 

"දෝණි"

දයාබර යහළු යෙහෙළියනි ...,

ඔවුන් දෙදෙනාම ගුරුවරුන් ලෙස බොහෝම සැප සම්පත් මැද නගයේ පාසල් වල සේවය කරමින් ජීවත් උන අය. ඔය අතර තමයි ඔහුට විදුහල්පති කෙනෙකු හැටියට කුඩා ගම්මානයකට පත්වීමක් ලැබෙන්නේ. අලුත විවාහපත් තරුණ යුවලක් නිසා ඇයත් හිතනවා ඒ පාසලටම මාරුවීමක් අරගෙන ඔහු සමඟම යන්න.  ගමේ ඉඳලා කොළඹ එනවා වගේ නෙමෙයි කොළඹ ඉඳලා ගමට යන්න ලේසියි නේ. ඉතින් හිතූ ලෙසටම අලුත් පාසැල් වාරයේ ඉඳලා දෙදෙනාම ගමේ පාසලට යන්න කටයුතු සූදානම් කර ගත්තා. 

ඔවුන්ගේ වාසස්ථානය වුනේ පාසැල් මායිමේ ම තිබෙන කුඩා නිවසක්. ගුරු නිවාසයක් කිවාට එය විශේෂ පහසුකම් තිබුන තැනක් උනේ නෑ.

ඔවුන් පාසලේ දුවා දරුවන්ට හරිම ආදරෙන් සැලකුවා. නගරේ වගේ නෙමෙයි ගමේ දරුවන්ගෙ වැඩිහිටියන්ගේ  දිළිඳු කම නිසාම ඇතිවන පොඩි පොඩි අඩුපාඩු දුක් ගැනවිලි අනන්තයි අප්‍රමාණයි. ඒත් ඒ ගමේ වැසියො හරිම ගුණ යහපත්. ඒ නිසාම කොතරම් දුක් පීඩා මැද වුනත් එම ගමේ දිගටම සේවය කරන්න ඔවුන් හිතාගත්තා. මේ දෙපලගේ තිබෙන හොඳ කම නිසාම ගමේ අයත් මේ අයට දැක්වුයේ ලොකු ආදරයක් ගෞරවයක් සහ ලෙන්ගතුකමක්.

ජීවිතය හරිම පුදුමාකාරයි...අපේ ජීවිත වල වගේම ඒ අයගෙත් ජීවිත වලත්  නොයෙකුත් හැල හැප්පීම් නොතිබුනාම නොවෙයි. හැම මොහොතකම අපි සිතන පතන දේම ලැබෙන්නෙත් නෑ  නේ.  එය කාටත් පොදු ධර්මතාවක්. ඒත් නොහිතන වෙලාවල් වල නොහිතපු විදිහට ලැබෙන දේවලුත් නැතිවාම නොවෙයි. ඉතින්  ඔයවගේ ලැබීම් සහ නොලැබීම අතර එයාලටත් තම ජිවන ඔරුව පැදගෙන යන්න සිදු වුනා. ඒ තමයි අපේ ජිවිත වල හැටි. 

ඉතින් ඔවුනගේ ජිවිතවලත්,  පාසල පිහිටි ලස්සන  ගම්මානයේත් .. තොරතුරු සමඟ  තවත්  රස තොරතුරු රැගත් ප්‍රථම පුරුෂ දෘෂ්ටි කෝණයෙන් ඉදිරිපත් කරන, මගේ අලුත්ම කවි කතාව වන "දෝණි" රසවිඳීමට ඔබට ඉතා ගෞරවයෙන් ආරාධනා කරමි.  

මෙය මගේ හෝ මා ඇසුරු කරන හිතමිතුරකු ලබපු අත්දැකීමක් වටා ගෙතුණු කතාවක් නොව මා විසින්ම නිර්මාණය කරන ලද්දක් බව ද,  මෙහි එන නම් ගම් සියල්ල මනස්කල්පිත බව ද කියනු කැමැත්තෙමි. 

සියලුම රස තොරතුරු සමඟින් ගොඩවෙන්නම් ඔබගේ නිවහනට ශනිදා දහයට ...

හද  බැති  මිතුරු වැඩිහිටි, බාලයිනෙ   සොඳ

නව කවි කතාවක ඇරඹුම තබමි             අද

දින දින ගෙවී යන ලෝකයෙ අරුම          විඳ

රැදෙනට ඇරයුමයි මේ සෙනෙහසිනි      තෙද

 ඉතින්.....,  

රැඳී සිටින්න මා සමඟ...

රස විඳින්න මගේ කවි....

පවසන්න ඔබේ අදහස් .....

ස්තුතියි ඔබ සැමට. 

1 කොටසට  👉

~~ ලියෝනි අමරතුංග ~~

~~~~~~

සේයාරූ අන්තර්ජාලයෙන්. Thanks Google Images.  - සියළු හිමිකම් මුල් හිමිකරුවන් සතුයි.

මා හද දිනු ළන්දු ..... (ශනිදා දහයට)

සුන්දර සිනහව තවරා පියවර නැගු පටු               දෙවට
සිත්ලන නෙක විසිතුරු කුසුමන් දිළුණයි පෙර         පිනට
වත්සුනු තවරා නොතිබුන පියකරු සඳ වැනි           වතට
පෙම් බැඳි දින තාමත් මතකයි අද ඊයෙක           ලෙසට

ලතැවුණි සිත රිසි ලෙස පෙම පවසනු බැරි වුනු        පවට

නොලැබුණි පින ලන් වන්නට සුසුමන් පිටවුණි        පෙළට

වියැලුණි සිනහව ගුලිවුණි සෝ ලතැවුල් හද        කොනට
බොඳවුණි දෙනයන සිහිවී ඔබ ගිය බව දුරු            රටට




ගනිනෙමි අතැගිළි හමුවෙන තුරු සෙනෙහස බර  සිරිකත
රැකගෙන යළි පැමිණෙන දින යුවතියකට හිමි      පතිවත
විසිතුරු නගරය මැද නාඳුනනා මොනරුද        ගැවසෙත
සඟවනු මැන බොළඳියෙ නොතලා නිකැළැල් ඔය හදවත

~~ ලියෝනි අමරතුංග ~~

~~~~~~

සේයාරූ අන්තර්ජාලයෙන් Google Images, - සියළු හිමිකම් මුල් හිමිකරුවන් සතුයි.

ඔහු ..... (ශනිදා දහයට)

 පෙර මඟ බලමි (ඇය හැරදා ගිය ඔහු ගේ පාපොච්චාරණය )

හදබැඳි සොඳුරිය
අප ගෙවු දිවිය මිහිරිය 
මිතුරගෙ සොයුරිය 
නිතර හමුවී පෑවෙ ඔමරිය 

හිතද හිරි වැටුණි 
තහනම් පෙමක පැටලුණි 
නුඹව අත හැරුණි 
ඇයගෙ සහයට නොයා බැරිවුණි 

නොසිතනු අහිතක්  
කලෙ මම නුඹට වරදක්  
තැවෙමින සහසක් 
සුසුම් ගිලිහෙයි නොමැත සතුටක් 

කිසි දින වරදක් 
නොකළ ඔබ දිව අඟනක් 
නොහෙලනු කඳුලක්  
කරුවෙ හැමවිට මමයි බොරුවක් 

ගිලිහෙත පැතුමන් 
සිරකර සිතෙහි හැඟුමන් 
ලබමින අවමන් 
පුරන බව දැනගතිමි පෙරුමන් 

අදරැති මියුලස 
නුඹ කුසෙහි මගෙ සෙනෙහස 
පිළිසිඳි අනුහස 
නොදැන සිටියෙම් විඳිමි උදහස 

ඔබහැර ගියමුත් 
තැවෙමි මනසින තවමත් 
සතොසින විඳගත්
එකදු මොහොතක් නොමැත අදටත් 

තුරුලෙහි විසුමට 
මදිය කල පින මිහිපිට 
උපදින බවයට 
නැවත එක්විය හැකිද අපහට...?

පිරිවර ගැවසෙත 
නොමැත තනියට හිතවත 
ඇතිදුක හදමත 
සතපවා ගමි කෙරෙන් මධුවිත 

( පියුම් ගී විරිත ඇසුරෙනි )

~~ ලියෝනි අමරතුංග ~~

~~~~~~

සේයාරූ අන්තර්ජාලයෙන් Google Images, - සියළු හිමිකම් මුල් හිමිකරුවන් සතුයි.