ඇය සුර ලඳකි
සහසක් සිහින මන කළඹන වෙලාවේ
දුටුවෙම් සුරඟනක හිනැහෙන ලතාවේ
මනරම් උදුල දෙනයන හද තලාවේ
රහසින් පැමිණ කිමිදුණි රස ගුලාවේ
දෙබැමද පරදවන සුර දුනු ලෙස කදිම
ඇය දෙවඟනකි දුටු විට නොම වනු පුදුම
පෙර කල පවකි නොදැනිම පිට විය සුසුම
දුර සිට විඳිමි සැනසෙමි හද බැඳි කුසුම
~~ ලියෝනි අමරතුංග ~~
කවි ගායනය රෝහණ දිසානායක
~~~~~~~~~~
දියඹට ගිය හිමි
දහසක් පැතුමන් හදෙහි දරාලා
සෙනෙහෙන් ගිලිහුණ සුසුම ඔතාලා
මිහිරෙන් පිරිමැද ලමැද තබාලා
හනිකෙන් ඔහු ගියෙ දියඹ බලාලා
ලෙළදේ සෙවනැළි සෙනෙහෙ කැදැල්ලේ
කැලඹේ සිතිවිලි මහද තොටිල්ලේ
ගෙපැලේ දිදුළයි පහන නිදැල්ලේ
ඇවිලේ සියොළඟ රැයෙහි මුළුල්ලේ
තනියක් නැත මට එය නොසිතන්නේ
නිදුකින් අළුයම මෙගොඩ ඇදෙන්නේ
හිරු මෙන් හිනැහී සතුට ගෙනෙන්නේ
දෙවියන් මගෙ හිමි නිබඳ රකින්නේ
( ගජ ඡන්දසට අයත් දෙව්ගීගාහ විරිත ඇසුරෙන් )
~~ ලියෝනි අමරතුංග ~~
~~~~~~~~~~~
ගජ ඡන්දසට අයත් දෙව්ගීගාහ විරිත ගැන එලු සඳස් ලකුණ විග්‍රහ කර ඇත්තේ පහත අයුරිනි.
ස ගණ සතර මතින්
බිති කොට විරම් දුට හොත්
පිළි දු නගණ යගණින්
බඳ දෙව්ගීගාහ නම්.
සොයමි හැරගිය පෙම
මනරම් තරුකැට
පිපී දිලෙන විට
මහද මතකයට
ඔබ දෙනයන මැවෙයි කදිමට
අතරින් නැග එන
පුරසඳ සුදිලෙන
සිහිකරයි නිතින
ඔබෙ පෙම්වත් වටකුරු උවන
දුකය ඉතින් මට
පවසමි කා හට
හදේ තනිකමට
හඬමි සැඟවී කුරිරු ලොවට
මතකය දිගේම
ඇවිද ගියෙමි මම
වෙහෙස නොබලාම
හමුවන තුරුම හැරගිය පෙම
(මත්වල ගී විරිත ඇසුරෙන් )
~~ ලියෝනි අමරතුංග ~~
~~~~~~
විරිතේ ස්වභාවය එලු සඳස් ලකුණෙහි අර්ථ ගන්වා ඇති යුරු..
වසම්හි අටමත්
සෙමෙ අට තෙළෙස් මත්
සත්තිස් මතින් මත්වල
ගී වේ දනු හෙ මෙසේ
සෙනෙහේ උල්පත
අම්මා මිහිමත
නැත කෙනෙක් සමව
ඉපිද මනුලොව දවයි මසිත
මතකය අවදිව
ආගිය වතගොත
සිහියට එනවිට
බොඳව යයි නෙතු යුග දුකටම
ජීවය දී මට
මා හඬනා විට
ලේ කිරිකර සිත
සතුටු වෙන්නට ඇති හොඳටම
මතු උපදින සඳ
මිහිමත වර ලැබ
නුඹේම දියණිය
වන්නයි මගේ එකම පැතුම
(මත්වල ගී විරිත ඇසුරෙන් )
මම ඔයාගෙ චූටි දූ
~ ~ ලියෝනි අමරතුංග ~ ~
විරිතේ ස්වභාවය එලු සඳස් ලකුණෙහි අර්ථ ගන්වා ඇති යුරු..
වසම්හි අටමත්
සෙමෙ අට තෙළෙස් මත්
සත්තිස් මතින් මත්වල
ගී වේ දනු හෙ මෙසේ