බිඳුණු පෙම

 

                                          බිඳුණු පෙම

        රුවින්  පිබිඳුන නුරා කුසුමකි කලතමින හද    පතුල      සිදුරූ  
        
ඉතින් කෙලෙසක හදා ගමි සිත බිඳ ලමින නුඹ තැනුව    පවුරූ
        ගිලන් සිතුවිලි දරා තෙරපෙන තනි රකින ඉකි කැලතු      සයුරූ
        දුකින් වැලපෙන නෙතින් සමුගෙන  මිහිකතට ගතු කියන අයුරූ 


( මදු ඡන්දස -  පුණුඅතිපුණු විරිත ඇසුරෙන්  )

~~ ලියෝනි අමරතුංග ~~

~~~~~~

විරිතේ ස්වභාවය එලු සඳස් ලකුණෙහි අර්ථ ගන්වා ඇති යුරු..
අටවිසි මතන් ලා
බඳ පුණුඅතිපුණු නම්
දනු තුදුස් සඳසෙහි
විරිත් නිදසුන් සැකෙවින්.

සේයාරූ අන්තර්ජාලයෙන් Google Images, - සියළු හිමිකම් මුල් හිමිකරුවන් සතුයි.

පෙමක මහිම

 

පෙමක මහිම 

හිරු සදිසි නුබ           සරසනා
හිමි නිබඳ දිවි             පුබුදනා
තුටු කඳුළු නෙතු      පොපියනා  
මුතු අහුරු මෙනි      දිළිසෙනා  

ගුණ සුවඳ හද          පතුරනා
නැත කෙනෙකු නුඹ    සමවනා
පෙර සසරෙ සිට      ගෙනඑනා
  හුරු පුරුදු බව       වැටහෙනා   

රස මුසුව දිවි          කලතනා
ලැබු පිනකි ඔබ         හිමිවුනා
මතු සසරෙ වුව        හමුවනා
  සුබ පැතුම හද      තෙරපෙනා  

( උතු චන්දාස - සුරමත්වැල​ විරිත  )

~~ ලියෝනි අමරතුංග ~~

~~~~~~~

එලු සදස් ලකුණ විරිත හඳුන්වා ඇති ආකාරය
සමමතෙයට වසම්
ලකුණු දුට සුරමත්වැල

සේයාරූ අන්තර්ජාලයෙන් Google Images, - සියළු හිමිකම් මුල් හිමිකරුවන් සතුයි.

ඇසුනිද රහස

රහස ඇසුනිද මගෙ හිමි සඳට

 

ඇසල සඳට සුමට
බිඳුනි ගණ අඳුර අවට
පැවසු සෙනෙහෙ දවට
රහස ඇසුනිද මගෙ හිමි සඳට

( මහපියුම් විරිත අසුරෙන් )

~~ ලියෝනි අමරතුංග ~~

~~~~~~

සේයාරූ අන්තර්ජාලයෙන් Google Images, - සියළු හිමිකම් මුල් හිමිකරුවන් සතුයි.

සඳට පෙම් බැඳ ..

 

සඳට පෙම් බැඳ ..

උපුල් නුවන් විදා මුවේ සිනා නගා සුරපුරෙනි          බැස
 සුපෙම් හැඟුම් මවා සෙනේ පතා හිදී සුරලියක      වෙස  
රුවින් රසින් නුරා පෙරා දොවා දිලේ මලට පිණි      ඉස  
බලන් අහස් තලේ වෙලී සුවේ දෙනා සොඳුරු සඳ    දෙස

එදා මෙදා තුරා දැරූ සුවේ සැදූ සිහිලැල්              රහස
  සදා රැඳේ හදේ පිදූ සෙනේහයේ හිරිමල්               පහස  
දියේ පිපී දිලේ නුරා සිනා සලා තඹරුන්                පලස
වෙලී ඉමූ භවේ පුරා අපේ වෙලා විඳිමින්           මෙලෙස

එබේ ගුවන් ගැබින් දුහුල් වලා ඉරා සුවසේ            නිදන
පසේ ඉදන් රඟත් තුටින් පිපී රිදී තරුසේ              රුවින
මුදා සොවින් තෙපුල් දෙමින් මවා හදේ සෙනෙහේ  පහන
ඔයා සෙමින් වසන් වෙමින් බිඳී මගේ සයනේ         සිහින
( මී ඡන්දසට අයත්  " පමදා විරිත " ඇසුරෙන් )

~~ ලියෝනි අමරතුංග ~~

~~~~~~~

එලු සදස් ලකුණ විරිත හඳුන්වා ඇති ආකාරය

ද ගණ ගුරින ද ගණ
ගුරින් ද ගණ ගුරුනෙන්
සත් මතෙකින් එළි සම
විසිපස්නි පමදා නම්

සේයාරූ අන්තර්ජාලයෙන් Google Images, - සියළු හිමිකම් මුල් හිමිකරුවන් සතුයි.

මගේ රන්කඳ

 

රන් කඳ මාගේ

කෝමළ රන් කඳ  මාගේ
නාඹර බැල්මකි     පෑවේ
මා ළය චන්චල      වූයේ
රෑ දුටු සීනෙක      වාගේ

විල් තෙර ලස්සන   වූවේ
නිල්මිණි කැල්මට   ඈගේ
රන් පැහැ අස්වනු    පීදේ
බක් නැකතින් ලැබ  ජීවේ

කැන්දන යන්නට   ඕනේ
  පැල්පත  දෙන්නට සෑහේ  
හිත්තුල දිස්වෙන   ආලේ
පෙන්වමු මල්බර   කාලේ

( අනුෂ්ටුප් ඡන්දස ට අයත් චිත්‍රපදා විරිත ඇසුරෙන් )

 

~~ ලියෝනි අමරතුංග ~~

~~~~~~~

 

මෙය සිලෝ විරිතකි.
පාදයක් "බ" ගණ දෙකක් සහ පාදාන්තය ගුරු දෙකකි (වර්ණ 8කි )
මෙයට එළි සමයක් අවස්‍ය නොවේ.

සේයාරූ අන්තර්ජාලයෙන් Google Images, - සියළු හිමිකම් මුල් හිමිකරුවන් සතුයි.